काठमाडौं- आकाशमा चक्कर लगाउन ‘होल्डिङ फ्यूल’ नपुग्ने भन्दै काठमाडौं आइसकेको नेपाल वायुसेवा निगमको एउटा जहाज दिल्ली पठाइएको छ।

त्रिभुवन अन्तर्राष्ट्रिय विमानस्थलमा अवतरणअघि ‘होल्डिङ फ्यूल’ नपुग्ने जनाउँदै दुबईबाट आएको आरए २३० नम्बरको उक्त जहाजलाई दिल्लीको इन्दिरा गान्धी विमानस्थलमा डाइभर्ट गरिएको हो ।

त्रिभुवन अन्तर्राष्ट्रिय विमानस्थलका प्रवक्ता रिञ्जी शेर्पाले जहाज शुक्रबार बिहान ९ : ४० मा अवतरण हुने तालिका थियो । तर एयर ट्राफिक जामका कारण निर्धारित समयमा अवतरण गराउन नसकिने भएपछि दिल्ली पठाइएको हो ।

केहीबेर आकाशमा होल्ड गरिए पनि फ्यूल नपुग्ने भएपछि दिल्ली पठाइएको शेर्पाले जानकारी दिएका छन् । यो जहाजमा दिल्लीमै इन्धन भरेर फेरि काठमाडौं ल्याउने तयारी भइरहेको छ।