काठमाडौं- जेन-जी अभियन्ता सुदन गुरुङ निर्वाचन आयोग पुगेका छन्। बिहीबार बिहान आयोग पुगेर गुरुङले हिमाली जिल्लामा मतदाता नामावली सङ्कलन गर्न कठिन भएकाले घुम्ती शिविर चलाउन माग गरेका छन् ।

गुरुङनिकट अर्का जेन-जी अभियान्ता अनिल बानियाँका अनुसार आयोगमा गुरुङले आयुक्तहरूसँग छलफल गरिरहेका छन्।

गुरुङले निर्वाचन आयोगको वेबसाइटमा देखिएका समस्या र आजबाट सार्वजनिक हुन लागेको अर्को निर्वाचन पोर्टललाई पनि थप प्रभावकारी बनाउन आग्रह गरेका छन् । उनले त्यसलाई सूचनामुखी बनाउनका लागि विभिन्न विकल्पमा छलफल गरेका छन् ।

‘मतदाता नावली सङ्कलनका लागि हिमाली जिल्लामा समस्या भइरहेको बुझेका छौँ । त्यसका लागि घुम्ती शिविर सञ्चालन लगायतको कार्यक्रम गर्न सुझाव दिएका छौँ’, बानियाँले खबरहबलाई भने, ‘आजबाट सार्वजनिक हुन लागेको अर्को निर्वाचन पोर्टललाई पनि व्यवस्थित र प्रभावकारी बनाउन सुझाव दिएका छौँ ।’

बानियाँका अनुसार आयोगले पनि जेन-जीका मागहरूलाई सम्बोधन गर्ने प्रतिबद्धता जनाएको बताएका छन्। बानिया निर्वाचन आयोगमा नयाँ दल दर्ताका लागि गुरुङ गएको कुरा गलत रहेको बताउँछन् ।

पछिल्लो समय गुरुङले जेन-जीको मागलाई सम्बोधन गर्न सरकारले विभिन्न विकल्पहरूमा कुराकानी गर्नुपर्ने बताइरहेका छन्। उनले बिहीबार मात्रै गृहमन्त्री ओमप्रकाश अर्यालय नेकपा एमालेका नेता जस्तो हुँदै गएको टिप्पणी गरेका थिए ।