काठमाडौं – ऊर्जामन्त्री कुलमान घिसिङले विद्युतको बक्यौता असुली ठोस परिणामतर्फ अग्रसर भएको भन्दै सबै सहयोगीलाई धन्यवाद दिएका छन्।

नेपाल विद्युत प्राधिकरणले लोडसेडिङको समयमा डेडिकेटेड र ट्रङ्क लाइनमार्फत विद्युत् उपभोग गर्ने उद्योगबाट किस्तामा महसुलको बक्यौता असुली प्रक्रिया अगाडि बढाएको छ। प्राधिकरणका अनुसार अधिकांश उद्योगले पहिलो किस्ता भुक्तानी गरिसकेका छन्।

राजनीतिक हस्तक्षेपका कारण लामो समयदेखि अवरुद्ध बक्यौता असुली अब ठोस नतिजातर्फ उन्मुख भएको मन्त्री घिसिङको भनाइ छ ।

बक्यौता रकम तिर्न थालेका उद्योगीहरूलाई धन्यवाद दिँदै घिसिङले असुलीमा सहयोग पुर्‍याउने प्रधानमन्त्री, अर्थमन्त्री, उद्योग वाणिज्य तथा आपूर्तिमन्त्री र नेपाल उद्योग वाणिज्य महासंघका पदाधिकारीहरूलाई पनि आभार व्यक्त गरेका छन् ।

सामाजिक सञ्जालमा सक्रिय घिसिङले लेखेका छन्, ‘, सबैको निरन्तर चासो, निगरानी र खबरदारी कारण अब बक्यौता असुली ठोस परिणामतर्फ अग्रसर भएको छ। हालको विषम परिस्थितिमा देशप्रतिको आफ्नो दायित्वबोधकासाथ बक्यौता रकमको किस्ता तिर्न सुरु गर्नुभएका सम्पूर्ण उद्योगी साथीहरूलाई हार्दिक धन्यवाद।’