काठमाडौं- ऊर्जामन्त्री कुलमान घिसिङ समूहले निर्वाचन आयोग पुगेर पुरानो उज्यालो नेपाल पार्टी अध्यावधिक गरेको छ।

निर्वाचन आयोगका सहायक प्रवक्ता प्रकाश न्यौपानेका अनुसार ज्ञानबहादुर तामाङ अध्यक्ष रहेको उज्यालो नेपाल पार्टीलाई संशोधन गरी पूर्वसचिव अनुपकुमार उपाध्यायलाई संयोजक प्रस्ताव गरिएको छ।

उपाध्यायलाई संयोजक बनाउने प्रस्ताव कुलमानले नै गरेका हुन् । पार्टीमा रहेका केन्द्रीय सदस्यबारे खुलाइएको छैन ।

उज्यालो नेपालले ५१ सदस्य केन्द्रीय समितिको प्रस्ताव गरेको छ। समितिमा उज्यालो नेपाल पार्टीका पूर्व संयोजक ज्ञानबहादुर तामाङ सदस्य छन्।

यस्तै पाँचथरका पहिचानवादी डा. महेन्द्र लावती, इलाम २ को उपनिर्वाचनमा पराजित डकेन्द्र थेगिम, ताप्लेजुङकी सरस्वती लिम्बू लगायत पनि समेटिएका छन् ।

कुलमाननिकट स्रोतका अनुसार यो पार्टीमा काठमाडौं महानगरपालिकाका मेयर बालेन्द्र साह, राष्ट्रिय स्वतन्त्र पार्टीकी पूर्वसांसद सुमना श्रेष्ठ र जेन-जी अभियान्ता सुदन गुरुङ भने समेटिएका छैनन्। पार्टीलाई अध्याविधक गर्ने क्रममा चुनाव चिह्न बलेको चिम मागिएको छ।

स्रोतका अनुसार ५१ केन्द्रीय सदस्यमा कुलमानको नाम अहिले समावेश छैन। कुलमान मन्त्री छाडेपछि मात्रै पार्टीको नेतृत्व लिने गरी समावेश हुने बताइएको छ ।