काठमाडौं –नेपाली राष्ट्रिय फुटबल टोली बिहीबार (आज) स्वदेश फर्किँदै छ । फिफा विश्वक २०२२ तथा एएफसी उसियन कप २०२३ अन्तर्गतको छनोट खेलका लागि जोर्डनमा रहेको नेपाली टोली आज बेलुका साढे ६ बजे काठमाडौं आइपुग्नेछ ।

नेपाली टोलीले पछिल्लो १५ दिन विदेशमा विताएको छ । जसमा नेपाल अस्ट्रेलियाविरुद्धको खेलका लागि असोज १५ गते अस्ट्रेलिया उडेको थियो । असोज २३गते अस्ट्रेलियाविरुद्ध र असोज २८ गते जोर्डनविरुद्ध खेलेको थियो । यी दुवै खेल नेपालले गुमाएको थियो ।

अस्ट्रेलियासँगको ५–० को हारलाई पनि सन्तोषजनक मानिएको छ । विश्वकप खेल्दै आएको अस्ट्रेलियासँग नेपालले पहिलो पटक खेलेको थियो ।

यता, तेस्रो पटक जोर्डनलाई भेटेको नेपालले उसको घरेलु मैदानमा ३–० गोलको पराजयलाई पनि नेपाली टोलीको प्रदर्शनलाई पनि सकारात्मक नतिजाका रुपमा विश्लेषण भइरहेको छ ।

विश्वकप छनोट अन्तर्गतको ४ वटा टोलीसँगको ‘अवे’ खेल नेपालले खेलिसकेको छ । जसबाट नेपालले ३ अंक जोड्दै समू बि मा चौथो स्थानमा छ ।

समूहमा ९ अंकसहित अस्ट्रेलिया शिर्ष स्थानमा छ भने जोर्डन ७ अंकसहित दोस्रो स्थानमा हुँदा तेस्रो स्थानमा रहेको कुवेतको ४ अंक छ भने समूहको पुछारमा चाइनिज ताइपेइ छ ।

अब नेपालले दशरथ रंगशालामा चार वटै टोलीसँग ‘होम गेम’ खेल्नेछ ।