काठमाडौं– नेकपा एमालेले विघटित प्रतिनिधिसभामा रहेका पार्टीका सांसदहरुको बैठक बोलाएको छ ।

पार्टीका तत्कालीन मुख्य सचेतक महेश बर्तौलाले आज एक विज्ञप्तिमार्फत आगामी मंसिर २ गते दिउँसो १ बजे पार्टी केन्द्रीय कार्यालय च्यासलमा बस्नेगरी बैठक बोलाइएको जानकारी गराएका छन् ।

बैठकमा मुलुकमा विकसित पछिल्लो राजनीतिक घटनाक्रमका विषयमा छलफल हुने जनाइएको छ ।

विज्ञप्तिमा मुलुकमा विकसित अहिलेको असामान्य र जटिल परिस्थिति तथा यसको लोकतान्त्रिक र संवैधानिक निकासका लागि निर्वाह गर्नुपर्ने भूमिकाका विषयमा छलफल गर्नुपर्ने भनिएको छ ।

एमालेले पछिल्लो समय प्रतिनिधिसभा पुनस्थापनाका लागि दबाब दिन आफ्ना सांसदहरुको हस्ताक्षर संकलन गर्दै आएको छ ।

एमालेले प्रतिनिधिसभा विघटन असंवैधानिक भन्दै विरोध जनाउँदै आएको छ ।