काठमाडौं– सञ्चार तथा सूचना प्रविधिमन्त्री जगदीश खरेलले नेपाल टेलिकमको काममा ढिलाइ गर्ने ठेकेदारहरूको सम्झौता तत्काल रद्द गर्न निर्देशन दिएका छन्  ।  

आइतबार काठमाडौंमा नेपाल टेलिकमले आयोजना गरेको कार्यक्रममा मन्त्री खरेलले टेलिकमको काममा ढिलाइ गर्ने वा जनतालाई गुणस्तरीय सेवा नदिने ठेकेदारहरूको सम्झौता तत्काल रद्द गर्न पनि निर्देशन दिएका हुन् ।

टेलिकमको जिम्मा लिएर काम नगर्ने र वर्षौँदेखि अल्झाइराख्ने ठेकेदार कम्पनीलाई कालोसूचीमा राखेर कारबाही गर्नुपर्ने उनले बताए ।

उनले निजी क्षेत्रले दुई महिनामा बनाउने सक्ने टावर टेलिकमले डेढ वर्षसम्म पनि बनाउन नसकेको विषयमा जवाफ चाहिने बताए ।

मन्त्री खरेलले आफ्नै खरिद कार्यविधि बनाएर पूर्वाधार निर्माणको कार्यलाई तीव्रता दिन निर्देशन दिए । सञ्चार मन्त्रालयमा आउने ८० प्रतिशत गुनासो नेपाल टेलिकमसँग सम्बन्धित रहेकाले मन्त्रीसम्म गुनासो आउने अवस्थालाई अन्त्य गर्न पनि उनले निर्देशन दिए  ।

टेलिकमको सेवा केवल शहरमा सीमित नहोस् भन्ने लक्ष्य रहेकाले दूर दराजका बस्तीहरूमा पनि फाइबर तथा टेलिफोन सेवा विस्तारका लागि ध्यान दिन उनले टेलिकमको ध्यानाकर्षण गराए ।  सो क्रममा मन्त्री खरेलले टेलिकमको फाइबर विद्यार्थी अफर (डेटा अफर) प्रारम्भ गरेका थिए ।