काठमाडौं – पूर्व महान्यायाधिवक्ता तथा अन्तर्राष्ट्रिय कानूनका प्राध्यापक डा. युवराज संग्रौलाले देशको वर्तमान राजनीतिक र आर्थिक अवस्थाबारे  गम्भीर टिप्पणी गरेका छन्।

अन्तर्राष्ट्रिय सम्बन्ध सरोकार समुदाय नेपालले शनिबार कीर्तिपुरमा आयोजना गरेको ‘जेन–जी आन्दोलनपछिको नेपालको राजनीतिक पद्धति र परराष्ट्र नीति’ विषयक गोष्ठीमा बोल्दै उनले यस्तो बताएका हुन्। 

डा. संग्रौलाले ‘जेन–जी आन्दोलन’ लाई किशोर–युवाहरूको राजनीतिक प्रवेशद्वार भनेका छन् । जेन(जी आन्दोलनले उठाएका मुद्दा महत्त्वपूर्ण रहेको उनले बताए। उनले भने, ‘जेन–जी आन्दोलन भनेको केवल सिंहदरबार जलाउने घटना होइन, यो नयाँ पुस्ताको राजनीतिक चेतना हो।’

भदौ २३ र २४ गतेका घटनालाई फरक दृष्टिले बुझ्न जरुरी रहेको उनले बताएका छन् । उनले राजनीतिक परिवर्तनलाई स्वीकार नगरे देश निषेधात्मक स्थिरता, अर्थात् ‘मुर्दा शान्ति’तिर जान सक्ने चेतावनी पनि दिए।

डा. संग्रौलाले नेपालमा दलतन्त्र चलेको तर लोकतन्त्र हराएको आरोप लगाउँदै राजनीतिक दलहरूले नीति र सिद्धान्त बिर्सिएको बताए।

 ‘कांग्रेससँग समाजवाद छैन, कम्युनिस्टहरू वैज्ञानिक साम्यवाद लिएर हिँडेका छैनन्,’ उनले भने।

उनले हालको अर्थतन्त्रमा नीतिगत भ्रष्टाचार मौलाएको आरोप लगाउँदै टाइकुनहरूलाई राज्यकै नीतिले संरक्षण गरिरहेको बताए। ‘नीतिगत भ्रष्टाचारले पैसाबाट पैसा कमायो, तर देशले आर्थिक विकास गर्न सकेन,’ उनले टिप्पणी गरे।

डा. संग्रौलाले सार्वजनिक सम्पत्ति बेच्ने, युवालाई रोजगारी नभई कोटाको राजनीति गर्न लगाउने र विदेशी ऋण बढ्दै जाने अवस्थाप्रति चिन्ता व्यक्त गरे। उनले भने, ‘हामी विचारबाट शासित हुने कि नाफाखोरबाट, अब यही निर्णायक प्रश्न हो।’

भ्रष्टाचार नियन्त्रणका लागि कठोर कदम आवश्यक रहेको बताउँदै उनले भने, ‘भ्रष्टाचार गर्नेलाई फलामको डन्डीले हान्नु पर्नेमा सिंहदरबारमा आगो लगाइयो। नेताहरूलाई नङ्ग्याएसम्म नेपालमा भ्रष्टाचार घट्दैन।’