लमजुङ– लमजुङमा जिप दुर्घटना हुँदा दुई जनाको मृत्यु भएको छ । बा८च ३७३१ नम्बरको बोलेरो जिप गए राति मर्स्याङ्दी गाउँपालिका– ३ खुदिबाट सोही पालिकाको वडा नम्बर ६ नाइचेमा दुर्घटना हुँदा जिप चालक दोलखा मेलुङ– ४ का ३० वर्षीय विनोद खड्का र २५ वर्षीय पारस खड्काको मृत्यु भएको जिल्ला प्रहरी कार्यालय सूचना अधिकारी ज्ञानेन्द्रबहादुर क्षेत्रीले जानकारी दिए ।

हिडिखोला हाइड्रोपावरको लागि सिमेन्ट लिएर जाँदै गरेको जिप अनियन्त्रित भएर सडकबाट ८०० मिटर तल खस्दा गम्भीर घाइते भएका उनीहरूको प्रहरीले उद्धार गरेर अस्पताल लगेको थियो ।

घाइतेलाई बेँसीसहर नगरपालिका–८ स्थित प्रदेश अस्पताल बेँसीसहर लमजुङमा उपचारको लागि लगिए पनि उपचारको क्रममा मृत्यु भएको प्रहरीले जनाएको छ ।

सोही जिपमा सवार ताप्लेजुङ सिदीङ्वा गाउँपालिका– ४ का  २० वर्षीय उमेश लिम्बू भने सकुशल रहेको प्रहरीले जनाएको छ ।