काठमाडौं – विवादित अभिव्यक्ति दिएको आरोपमा पक्राउ परेका निकोलस भुसालको बन्दीप्रत्यक्षीकरण रिटमाथि सर्वोच्च अदालतलेकारण देखाउ आदेश जारी गरेको छ ।

शुक्रबार न्यायाधीश सुनिल कुमार पोखरेलको इजलासले प्रारम्भिक सुनुवाइपछि प्रहरी प्रशासनलाई ‘भुसाललाई किन र कसरी पक्राउ गरियो’ भन्ने विषयमा स्पष्टीकरण दिन आदेश गरेको हो ।

निकोलस भुसालले कात्तिक १६ गते सामाजिक सञ्जालमार्फत पूर्वप्रधानमन्त्री केपी शर्मा ओली, पूर्वगृहमन्त्री रमेश लेखक र तत्कालीन काठमाडौं प्रमुख जिल्ला अधिकारी छवि रिजालको घर घेर्ने चेतावनी दिँदै विवादास्पद पोस्ट गरेका थिए । सो पोस्टमा उनले ‘क्षेप्यास्त्र आक्रमण गर्ने’ जस्ता हिंसात्मक अभिव्यक्ति पनि दिएका थिए ।

त्यसपछि भुसाललाई प्रहरीले हिंसा भड्काउने अभिव्यक्तिको आरोपमा पक्राउ गरेको थियो ।