काठमाडौं– राष्ट्रिय स्वतन्त्र पार्टीको विस्तारित बैठक चितवनको सौराहमा जारी छ। आजको बैठकमा राजनीतिक प्रतिवेदन प्रस्तुत गर्दै कार्यवाहक सभापति डीपी अर्यालले जेनजी आन्दोलनपछि निर्वाचन नै मुख्य कुरा रहेको उल्लेख गरिएको छ ।

प्रतिवेदनमा प्रधानमन्त्री सुशीला कार्कीले चुनावी वातावरण बनाउने प्रयास थालेपनि केही नेतासँग प्रधानमन्त्रीले संवाद गर्न अनिच्छा देखाउँदा सरकार र दलको दूरी बढ्ने हो कि भन्ने स्वाभाविक चिन्ता रहेको उल्लेख गरिएको छ ।

‘निर्वाचन नै मुख्य कार्यभार रहेको सरकारले दलहरूलाई विश्वास लिएर चुनावी वातावरण बनाउने प्रयास त थालेको छ । तर केही नेता विशेषसँग प्रधानमन्त्री स्वयंको संवाद अनिच्छाले ती दल र सरकारबीचको दूरी बढाउने हो कि भन्ने स्वभाविक चिन्ता पनि छ ।’ राजनीति प्रतिवेदनमा भनिएको छ, ‘सरकार सबै दल नेता र जनताको अभिभावक भएकाले उसमा कसैप्रति पनि आग्रह पूर्वाग्रह पटक्कै हुनुहुन्न । प्रहरीको खस्किएको मनोबल, आन्दोलनका क्रममा लुटेका हतियार अझै कारागार नफर्किएका कैदी जेन–जी नाममा आइरहेका विभिन्न माग र भइरहेका अस्वभाविक व्यवहार पनि चुनावका चुनौती हुन् यसतर्फ सरकार सचेत हुनुपर्छ ।’

अर्यालले जारी गरेको प्रतिवेदनमा निर्वाचनबाहेक अहिले अरु विकल्प नरहेको भन्दै अन्य दलहरूलाई पनि निर्वाचनमा होमिन सुझाव दिएको छ ।