काठमाडौं- नेपाली कम्युनिस्ट पार्टीका सह-संयोजक माधवकुमार नेपालले विगतका कमीकमजोरी सच्च्याउँदै कम्युनिस्ट आन्दोलनलाई सशक्त रुपमा अघि बढाउनुपर्ने बताएका छन् ।

बुधबार काठमाडौंमा आयोजित पार्टी एकता कार्यक्रममा नवघोषित पार्टीका सह-संयोजक नेपालले जनतामा विश्वास दिलाउन विगतका कमी-कमजोरी सच्याउँदै कम्युनिस्ट आन्दोलनलाई सशक्त रुपमा अघि बढाउनुपर्ने बताएका हुन् ।

उनले नेपाली कम्युनिस्ट पार्टी पुरानै पार्टीको स्वरुप नभएको भन्दै परिवर्तनको सम्वाहक बनेर जनताको मनमा बस्नेगरि अघि बढ्नुपर्ने बताए।।

उनले परिवर्तनका शक्तिहरूसँग सहकार्य वा मोर्चा बनाएर संविधान र गणतन्त्रको रक्षाका लागि हातेमालो गर्न पहल गरिने उल्लेख गरे ।

बन्देज, आग्रह र पूर्वाग्रह नराखी सबैलाई समेट्नेगरी गोलबद्ध गरेर अघि बढ्न चाहेको भन्दै उनले देशविरोधी, संविधानविरोधीसँग कुनै सम्झौता नगर्ने स्पष्ट पारे । जेन-जी युवाहरूको मुद्दालाई पनि आफूहरूले प्राथमिकतामा राखेर अघि बढाउने उनले बताए ।

सह-संयोजक नेपालले नवयुवा जेन-जीका मुद्दालाई समेत साथमा लिएर जाने बताए । नेपाली कम्युनिस्ट पार्टीलाई नेपालको मूल कम्युनिस्ट पार्टी बनाइने पनि उनले जिकिर गरेका छन् ।