काठमाडौं-ताप्लेजुङमा भएको हेलिकोप्टर दुर्घटनामा परी ज्यान गुमाएका संस्कृति पर्यटन तथा नागरिक उड्डयनमन्त्री रवीन्द्र अधिकारीसहित ७ जनाको शव प्रतिकूल मौसमका कारण काठमाडौं ल्याउन कठिनाई भइरहेको छ।

दुर्घटनास्थलबाट बुधबार ४ जनाको शव सुकेटार विमानस्थल ल्याइएको थियो । बाँकी ३ जनाको शव आज(बिहीबार)बिहानै विमानस्थलमा ल्याएर मुचुल्का तयार पारी काठमाडौं पठाउने तयारीका साथ राखिएपनि मौसमका कारण उडान हुन नसक्दा ल्याउन कठिनाई भइरहेको छ ।

सुकेटार विमानस्थल परिसरमा रहेका होलट व्यवसायी ओम राईका अनुसार अहिले सुकेटार क्षेत्रमा हिमपात भइरहेको छ । लगातारको हिमपातका कारण कुनै उडान भर्न सक्ने अवस्था नरहेको राईले खबरहवलाई जानकारी दिए ।

मौसममा सुधार हुने वित्तिकै शवलाई काठमाडौं पठाइने ताप्लेजुङका प्रमुख जिल्ला अधिकारी अनुज भण्डारीले जानकारी दिए ।