काठमाडौं- नेकपा माओवादी केन्द्र नेतृत्वमा बनेको कम्युनिस्ट घटकहरूको नयाँ पार्टीमा नेकपा एकीकृत समाजवादीका सम्मानित नेता झलनाथ खनाललाई तेस्रो वरीयता दिइने भएको छ।

बुधबार बिहान खुमलटारमा फाइनल बैठक बसेर माओवादी केन्द्रका संयोजक पुष्पकमल दाहाल प्रचण्ड उनका लागि तेस्रो वरीयता तय गरेका हुन् ।

छलफलका क्रममा तेस्रो वरियता दिनेपछि उनी पार्टी एकता सभामा अन्तिम समयमा सामेल भएको उनीनिकट नेताहरू बताउँछन् ।

खनालले पनि आफूलाई प्रचण्डले सम्मानपूर्वक राख्छु भनेपछि एकतामा सामेल भएको बताएका छन्।

नयाँ बन्न लागेको पार्टीमा प्रचण्ड संयोजक त्यसपछि माधव नेपालको पद र तेस्रो वरीयतामा झलनाथ खनालको पद रहनेछ।

प्रचण्ड संयोजक भएर दुई नेता सह-संयोजक हुनसक्ने नेताहरूले बताएका छन् । तर कुन पद भन्ने अहिलेसम्म टुङ्गो नलागेको उनीनिकट नेताहरू बताउँछन्।

‘पुष्पकमल दाहाल प्रचण्ड त्यसपछाडि माधव नेपाल र तेस्रो वरीयतामा झलनाथ कमरेड रहनुहुन्छ’, एक नेताले खबरहबलाई भने,‘बुधबार बिहान प्रचण्ड र झलनाथ भेटेर यसबारे निर्णय भएको हो।’

स्रोतका अनुसार मंगलबार र बुधबार पनि माधव नेपाल र प्रचण्डले झलनाथको पदका विषयमा लामो छलफल गरेका थिए।

त्यसपछाडि प्रचण्डले उनलाई तेस्रो वरीयता दिएपछि एकतामा जान तयार भएको स्रोतले जनाएको छ ।