काठमाडौं- नेपाली कम्युनिस्ट पार्टीको एकता घोषणा सभामा नेकपा (एकीकृत समाजवादी) का सम्मानित नेता झलनाथ खनाल पनि सहभागी भएका छन् ।

अन्तिम समयमा सहभागी हुन पुगेका उनले केपी शर्मा ओली नेतृत्वको दुईतिहाइको सरकार असफल भएपछि जेन–जी आन्दोलन जन्मिएको बताएका छन्।

उनले आन्दोलनको सुरुवाती उद्देश्यप्रति पूर्ण समर्थन रहेको बताउँदै भने, ‘जेन–जी भाइबहिनीहरूको आन्दोलनमा हाम्रो पूर्ण समर्थन थियो, मैले पनि समर्थन गरेको थिएँ।’

तर खनालले भदौ २३ गते सुरु भएको आन्दोलनमा बाह्य शक्तिहरूले हस्तक्षेप गरेपछि हिंसा फैलिएको आरोप लगाए।

‘भदौ २३ गतेको आन्दोलनलाई अरू सन्ड मुसुन्डले कब्जा गरेपछि हिंसा भयो,’ उनले भने, ‘भदौ २४ गते तिनै सन्ड मुसुन्डले ठूलो विध्वंश मच्चाए। कोत पर्वभन्दा पनि ठूलो, अलौ र भण्डारखाल घटनाभन्दा पनि व्यापक हत्याकाण्ड र हिंसा भयो।’

उनले त्यस्तो विध्वंसपछि देश गम्भीर संकटमा परेको बताउँदै अबको पुनर्निर्माण जिम्मेवारी कम्युनिस्टहरूले लिनुपर्ने स्पष्ट गरे।

‘नेपाल अहिले त्यो विध्वंशको शिकार भएको देश हो,’ खनालले भने, ‘यसको पुनर्निर्माण कम्युनिस्टहरूले मात्रै गर्न सक्छन्।’