नुवाकोट – नुवाकोटको बट्टार बजारमा बसले किच्दा एक बालकको मृत्यु भएको छ । आज दिउँसो केरुङ यातायातको बा ४ ख ७५०४ नम्बरको बसले किच्दा तारकेश्वर गाउँपालिका–६ गोस्र्याङ घर भएका प्रताप तामाङका ६ वर्षीय छोरा युनिक तामाङको ज्यान गएको जिल्ला प्रहरी कार्यालयले जनाएको छ ।

बालकको घटनास्थलमै ज्यान गएपछि स्थानीयले चालकलाई घाइते हुने गरी कुटेका छन् भने बससमेत तोडफोड गरेका छन् ।

घाइते चालकको स्थानीय स्वास्थ्य संस्थामा उपचार भइरहेको  प्रहरीले जनाएको छ । मृतकका आफन्तले बसलाई जलाउने प्रयास गरेपछि भीड तितरवितर पार्न प्रहरीले पाँच सेल अश्रुग्याससमेत प्रहार गरेको थियो ।

मृतक बालकका आफन्तले दोषीलाई कडा करवाही र पीडित परिवारलाई उचित क्षतिपूर्ति दिन माग गरेर बट्टार बजार बन्द समेत गराएका छन् ।