काठमाडौं- राष्ट्रिय स्वतन्त्र पार्टी (रास्वपा) का वार्ता टोली संयोजक पुकार बमले नयाँ दल र स्वतन्त्र नेताहरूबीच एकता हुन नसके निकट भविष्यमा उनीहरूविरुद्ध विभिन्न गम्भीर मुद्दा दायर हुने चेतावनी दिएका छन्।

बमले सामाजिक सञ्जालमार्फत सार्वजनिक गरेको ‘७ बुँदे ध्यानाकर्षण’ शीर्षकको वक्तव्यमा यस्तो चेतावनी दिएका हुन् । उनले भनेका छन्, ‘मुद्दा, विचार र सिद्धान्त एउटै हुँदाहुँदै पनि यदि सबैजना अलग–अलग बाटो लाग्ने हो भने अबको बाटो स्पष्ट छ-जेलभित्र।’

सम्भावित मुद्दाको चेतावनी

बमले ऊर्जा मन्त्रीसमेत रहेका कुलमान घिसिङ, काठमाडौंका मेयर बालेन्द्र साह, रास्वपाकी पूर्वसांसद सुमना श्रेष्ठ, हामी नेपालीका संयोजक सुदन गुरुङ र सागर ढकाललगायतको नाम नै लिएर यिनीहरूबीच सहकार्य नभए एक दिन मुद्दा लाग्ने बताए ।

उनले भनेका छन्, ‘यदि बेलैमा एक नहुने भए देशद्रोह, आतंकवाद प्रोत्साहन, साम्प्रदायिक दंगा उत्प्रेरणा, आन्दोलनमा भीडलाई उक्साएको, विध्वंश मचाएको, आगजनी र सार्वजनिक सम्पत्ति तोडफोड जस्ता मुद्दा लगाउने तयारी भइरहेको देखिन्छ।’

उनले आगामी फागुन २१ गतेको निर्वाचनपछि पुराना राजनीतिक दलहरूको गठबन्धन पुनःसत्तामा फर्किएमा, “अपरेशन किलोसेरा टु, भर्सन २’ कारबाहीमार्फत् नयाँ पुस्ताका वैकल्पिक र स्वतन्त्र नेताहरूमाथि व्यापक दमन सुरु हुन सक्ने पनि चेतावनी दिए।

‘जेलमै वार्ता गर्ने दिन टाढा छैन’

बमले व्यङ्ग्यात्मक शैलीमा लेखेका छन्, ‘यदि अहिले एकता हुन सकेन भने भोलि सबैजना नक्खु कारागारभित्र सानो चिमको उज्यालोमा भजन, नाचगान र र्‍याप ब्याटलको तालमा एकताको वार्ता गर्नुपर्ने स्थिति आउन सक्छ।’

रास्वपामाथि राजनीतिक प्रतिशोध

उनले भदौ २४ गते ढलेको कांग्रेस–एमाले सरकारलाई पनि आरोप लगाउँदै भनेका छन्, ‘केपी शर्मा ओली–शेरबहादुर देउवा नेतृत्वको दुईतिहाइको सरकारले रवि लामिछानेमाथि राजनीतिक प्रतिशोध साधेको इतिहास जगजाहेर छ।’

बमले नयाँ वैकल्पिक धारका नेताहरूलाई लक्षित गर्दै प्रश्न पनि गरेका छन् । ‘भोलि कुलमान घिसिङमाथि भ्रष्टाचार र सम्पत्ति शुद्धिकरण, बालेन साह र उनका समर्थकमाथि देशद्रोह र आतंकवाद प्रोत्साहनका मुद्दा दायर भएपछि तपाईंहरू कसरी प्रतिक्रिया दिनुहुन्छ? त्यस्तो अवस्थामा तपाईंहरू नेतृत्वबाट पछि हट्नुहुन्छ कि जेलमै प्रतिरोध गर्नुहुन्छ?’

अहिले मौन बस्दा पछि पश्चाताप

उनले सबै नयाँ र स्वतन्त्र राजनीतिक समूहलाई तत्काल एकै प्लेटफर्ममा आउन आह्वान गर्दै लेखेका छन्, ‘अहिले तपाईंहरूलाई यो सब परेको छैन, त्यसैले जवाफ दिन सजिलो छ। तर परिसकेपछि धेरै ढिलो भइसकेको हुनेछ।’