काठमाडौं- नेकपा एकीकृत समाजवादी पार्टीको सचिवालय बैठक सकिएको छ।

सचिवालय बैठकले कात्तिक १९ गते आठ पार्टीहरूबीच हुन लागेको एकता सम्मेलनमा आफ्नो पार्टी पनि सामेल हुने निर्णय गरेको छ।

पार्टी नेता मेटमणि चौधरीका अनुसार बैठकमा महासचिव घनश्याम भुसाल र सम्मानित नेता झलनाथ खनाल उपस्थित थिएनन् ।

माओवादी लगायत आठ दलसँग एकीकरण गर्ने निर्णय एकीकृत समाजवादीले गरेसँगै समाजवादीका महासचिव भुसालसहित सम्मानित नेताहरू असन्तुष्ट छन्।

असन्तुष्ट पक्षले शुक्रबार छुट्टै भेला गरेर पार्टी एकीकरणमा नजाने बताएको थियो।

शुक्रबार खबरहबसँग कुरा गर्दै पार्टी महासचिव भुसालले एकीकृत समाजवादीको सचिवालय बैठक पछाडि आफूले के गर्ने भन्नेमा निर्णयमा पुग्ने बताएका थिए ।

तर शुक्रबार भएको सचिवालय बैठकमा उनी नगएपछि छुट्टै योजना बनाएको बुझिएको छ । भुसाल पार्टी पुनर्निर्माणमा अगाडि बढ्ने योजनामा छन् ।