काठमाडौं– माधवकुमार नेपालले नेकपा माओवादी केन्द्रसँग एकता गर्ने निर्णयसँगै नेकपा एकीकृत समाजवादी पार्टी चोइटा चोइटा हुने अवस्थामा पुगेको छ।

चार वर्षअघि नेकपा एमालेबाट चोइटिएर बनेको एकीकृत समाजवादीलाई माओवादीमा समाहित गराउने नेपालको निर्णयमा विद्रोह गरेको झलनाथ खनाल र घनश्याम भुसाल समूह पनि फुट्ने अवस्थामा पुगेको छ।

उक्त समूहमा रहेका नेतृ रामकुमारी झाँक्री, पूर्वसांसद किसान श्रेष्ठसहितका नेताहरू एमालेमै फर्निने गरी छलफलमा रहेको खुलेको छ ।

‘अहिले संवाद भइरहेको छ । हामी कुरा गरिरहेका छौँ’, श्रेष्ठले खबरहबसँग भने, ‘हामी गुन्डु (नेकपा एमाले अध्यक्ष केपी शर्मा ओलीको निवास) तिरै फर्किने सम्भावा छ ।’

श्रेष्ठले अहिले नै टुंगो नभइसके पनि ५० प्रतिशत भन्दा बढी सम्भावना एमालेमै फर्किने रहेको बताएका छन्।

उनका अनुसार आधा दर्जनबढी नेताहरू अहिले एमालेमा फर्किने गरी छलफलमा रहेका छन् । तर उनले ती नेताहरू को को हुन् भन्ने खुलाएनन्।