काठमाडौं – नेकपा एकीकृत समाजावादीका नेता बामदेव गौतम माओवादी केन्द्रसँगको एकताको पक्षमा उभिएका छन् । उनले अब यताउता नगर्ने नेकपा एकीकृत समाजवादीका अध्यक्ष माधव नेपाल जहाँ जान्छन् त्यही जाने बताए।

नेकपा माओवादी केन्द्र, नेकपा एकीकृत समाजवादी, नेसपा, नेपाल कम्युनिस्ट पार्टी लगायतका दलहरूबीच १८ गते एकीकरण हुन लागेको भन्दै आफू त्यो एकीकरण भएको पार्टीमा रहने उनले बताएका हुन् ।

‘माधव प्रचण्ड सहित सातवटा राजनीतिक दलहरूको एकीकरण हुन लागेको छ । म माधव नेपालसँगै एकीकरणको पक्षमा रहनेछु’ गौतमले खबरहबलाई भने, ‘एकीकरणपछि कसको पद के रहने र कसलाई के जिम्मेवारी दिने भन्ने विषयमा माधव प्रचण्ड र अरु नेताहरु छलफल गरिरहेका छन् । मैले कुनै पद मागेको छैन तर मलाई सम्मानजनक पद दिन्छन् भन्ने अपेक्षा गरेको छु।’

गौतमले केही समय अगाडि खबर हबसँगको अन्तर्वार्तामा नेकपा माओवादी केन्द्रका अध्यक्ष पुष्पकमल दाहाल प्रचण्डको कुरा नसुन्ने बताएका थिए। तर केही कम्युनिस्ट पार्टीहरू एकीकरण हुने भएपछि उनी माओवादी अध्यक्ष प्रचण्डलाई नराम्रो भन्ने पक्षमा अहिले छैनन्।

‘मैले प्रचण्डसँग जाँदिन भनेको थिएँ । खास हामी प्रचण्डसँग गएको पनि होइन। पार्टीहरू एकीकरण गर्न खोजेको हो’ उनले अगाडि भने, ‘कम्युनिस्ट पार्टी एकताको पक्षमा त म पहिलेदेखि नै थिएँ ।’