काठमाडौं- नेकपा एकीकृत समाजवादी पार्टीका अध्यक्ष माधवकुमार नेपालले आफूविरुद्ध तत्कालीन प्रधानमन्त्री केपी शर्मा ओलीको आदेशमा मुद्दा चलाइएको बताएका छन्।

तीन दिनदेखि जारी केन्द्रीय कमिटी बैठकलाई शुक्रबार सम्बोधनका क्रममा उनले आफूले गर्दै नगरेको कुरामा भ्रष्टाचार मुद्दा लगाइएको बताए ।

‘मैले भ्रष्टाचार गरेको होइन, त्यो भ्रष्टाचारको केस होइन । राज्यलाई हानी नोक्सानी गरेको लेखिएको छ। मैले राज्यलाई के हानी नोक्सानी गरेँ ?’, उनले भने ‘सरकारी जग्गा पतञ्जलिलाई दियो भनिएको छ । एक टुक्रा पनि दिइएको छैन। निजी जग्गालाई हदबन्दीभन्दा बढी भएकाले बिक्री गरेर सट्टापट्टा गरेको हो । हदबन्दीभन्दा बढी जग्गा प्रयोग गर्न दिइने कुरा कानुन बमोजिम गरेको गरेको हो।’

उनले तत्कालीन प्रधानमन्त्री ओलीको आदेशमा आफूलाई फसाइएको दोहोरर्‍याए । ‘केपी ओलीको विशेष आदेशमा मलाई भ्रष्टाचार मुद्दा हालियो’, उनले भने, ‘अख्तियारले तामेलीमा राखिएको मुद्दा ब्यूँत्याइएको हो । ओ‌लीले बदलाको भावले मलाई बदनाम गराएका हुन् ।’