काठमाडौं- नेपाली काङ्ग्रेसका दुईजना महामन्त्री गगनकुमार थापा र विश्वप्रकाश शर्मा अहिले कार्यवाहक सभापति पूर्णबहादुर खड्काको निवासमा पुगेका छन् ।

आगामी १५ औँ महाधिवेशनको कार्यतालिका जारी केन्द्रीय कार्यसमिति बैठकबाट पारित गर्ने रणतीतिमा रहेका थापा र शर्माले कार्यवाहक सभापति खड्कालाई मनाउन उनको निवास गल्फुटारमा पुगेका हुन् ।

शुक्रबार बिहान नेता डा. शेखर कोइरालाको सम्पर्क कार्यालय विशालनगरमा छलफल गरेर महाधिवेशनको खाका तयार गरेपछि थापा र शर्मा खड्काको निवास छिरेका हुन् ।

शुक्रबार बिहान सम्पर्क कार्यालय विशालनगरमा डा. कोइरालाले आफूपक्षीय भेला गरेर नियमित महाधिवेशनको तालिका बनाएको थियो । उक्त तालिका जारी केन्द्रीय कार्यसमितिबाट सर्वसम्मत पास गराउन भन्दै महामन्त्रीद्वयले कार्यवाहक सभापति खड्कालाई भेटेर छलफल गरिरहेका छन्।

कांग्रेस उपसभापति धनराज गुरुङका अनुसार नियमित महाधिवेशनका लागि बनाइएको तालिका शुक्रबार बस्ने बैठकमा प्रस्तुत गरिनेछ।

पार्टीभित्रको गतिरोध अन्त्य गरि नियमित महाधिवेशनको कार्यतालिका ल्याउने विषयमा नेपाली कांग्रेसका नेता डा. शेखर कोइरालाले आफूनिकट पदाधिकारीसँग शुक्रबार बिहान छलफल गरेका थिए ।

कोइरालाले आफ्नो सम्पर्क कार्यलय विशालनगरमा उपसभापति धनराज गुरुङ, महामन्त्रीहरू गगन थापा र विश्वप्रकाश शर्मा, सहमहामन्त्रीद्वय जीवन परियार र बद्री पाण्डेसँग बिहान छलफल गरेका थिए ।