सुर्खेत- नेपाली कांग्रेसका नेता हृदयराम थानीले सबै राजनीतिक दल मिलेर तोकिएको समयमा निर्वाचन सम्पन्न गर्न लाग्नुपर्ने बताएका छन्। मंगलबार वीरेन्द्रनर सुर्खेतमा पत्रकारहरूसँग कुरा गर्दै नेता थानीले सो कुरा बताएका हुन्।

कांगेस–एमालेसहितको संयुक्त सरकारले देशमा प्रगति गर्न नसकेको स्वीकार गरे। उनले ओली नेतृत्वको सरकारले काम गर्न नसकेका कारण देशमा यो स्थिति आएको स्पष्ट पारे।

‘जेनजीहरूको माग भ्रष्टाचारको अन्त्य र सुशासन कायम भन्ने थियो। सरकारले त्यसलाई बेलैमा बुझ्न नसक्दा यो परिणाम आयो,’ नेता थानीले भने, ‘सामाजिक सञ्जाल मात्र अघिल्लो दिन भदौ (२३) खोलिदिएको भए देशमा यति ठुलो क्षति हुने थिएन।’

आफूले समितिको बैठक र सरकारलाई देशमा यो स्थिति हुँदैछ भनेर पटक पटक सम्झाएको स्मरण गरे। दुर्गा प्रसाईंको चार हजारको जुलुसमा त देशको यो हालत भयो भने ४० हजारको जुलुस आयो भने के होला? भनेर सम्झाउँदा पनि सरकारले वास्ता नगरेको जिकिर गरे।

तोकिएको मितिमा निर्वाचन सम्पन्न गर्नुको विकल्प नरहेको भन्दै उनले अहिले पार्टीलेभन्दा पनि देशले निर्वाचन जित्ने गरेर सबै एक भएर लाग्न आह्वान समेत गरे।