काठमाडौं– शरीरमा पेट्रोल खन्याएर आत्मदाह प्रयास गरेकी गायिका नितु पौडेलको निधन भएको छ।

जिल्ला प्रहरी परिसर काठमाडौंका प्रवक्ता पवन भट्टराईका अनुसार शुक्रबार बिहान कीर्तिपुरस्थित वर्न अस्पतालमा उपचारका क्रममा उनको मृत्यु भएको हो ।

नितुले गत शनिबार दिउँसो साढे २ बजेतिर अनामनगरस्थित स्टुडियोमै आफैंले आफ्नो शरीरमा पेट्रोल छर्केर आत्मदाह प्रयास गरेकी थिइन्। त्यसबेला पौडेलको ५५ प्रतिशत शरीर जलेको थियो ।

उनीनिकटहरूका अनुसार नितु र गायक बाबुल गिरी प्रेम सम्बन्धमा थिए । त्यही सम्बन्धमा खटपट आएपछि उनले आत्मदाह प्रयास गरेकी थिइन् ।

उक्त घटनापछि प्रहरीले बाबुल उपनामका धनबहादुर गिरीलाई नियन्त्रणमा लिएको थियो । उक्त घटनामा गिरी पनि घाइते भएका थिए। उनको हात र खुट्टा जलेको पाइएको थियो। 

नितुले आत्मदाहा प्रयास गरेको घटनाको अनुसन्धानका लागि स्टुडियो सञ्चालक गिरीलाई नियन्त्रणमा लिइएको थियो ।

प्रहरीले त्यसबेला जलेर घाइते नितुको परिवार, आफन्त र प्रत्यक्षदर्शीलाई पनि सोधपुछका लागि झिकाएको थियो ।