काठमाडौं- गृहमन्त्री ओमप्रकाश अर्यालले विदेशतिर लुक्न भागेकाहरू पनि ‘नेपालमै छु’ भनेर देखा पर्न थालेको टिप्पणी गरेका छन् ।

मंगलबार प्रधानमन्त्रीको सरकारी निवास बालुवटारमा गत भदौ २३ र २४ गते भएको जेन-जी आन्दोलका घाइतेहरूसँग प्रधानमन्त्री सुशीला कार्कीले गरेको छलफलमा अर्यालले यस्तो भनेका हुन् ।

जेन-जी आन्दोलनका घाइतेरूले जेन-जी आन्दोलनमा दमन गरेको र भ्रष्टाचारमा मुछिएको आरोप लागेका व्यक्तिहरू भाग्न खोजेको बताएका थिए । त्यस्तै उनीहरूले ती अकुत सम्पत्ति लुकाउन सक्रिय भएको भन्दै चिन्ता जनाएपछि अर्यालको यस्तो जवाफ दिएका हुन् ।

‘भाग्न खोजेकाहरू, लुकेकाहरू पनि भाग्न नसक्ने अवस्था आएपछि ‘नेपालमै छु’ भनेर देखापर्न थालेका छन्’, उनले जेन-जीका घाइतेहरूसँगको छलफलमा भनेका छन् ।

अर्यालले केही दिनअघि नेपाली कांग्रेसका नेतासमेत रहेका पूर्वऊर्जामन्त्री दीपक खड्का अमेरिका भागेको जिकिर गरेका थिए ।

तर खड्का सोमबार जेन-जी आन्दोलनका क्रममा जलाइएको आफ्नै निवासमा झुल्किए । उनले त्यहाँ पत्रकार सम्मेलन गरेर सरकारलाई चुनौती पनि दिए ।

खड्काले श्रीमती बिरामी भएर दिल्ली गएको बताएका थिए । उनले श्रीमतीलाई उपचारका लागि दिल्ली गएपछि आफूलाई पनि डेंगु भएको उल्लेख गरे ।

उनी आइतबार भारतको दिल्लीबाट गुहावटीको बागडोग्रा विमानस्थलमा उत्रिएर स्थलमार्ग हुँदै झापाको भद्रपुर आएका थिए । त्यहाँबाट उनी आइतबार साँझ नै जहाजमा काठमाडौं उत्रिएर पत्रकार सम्मेलन गरेका थिए ।