काठमाडौं- लामो समयदेखि चिकित्सा शिक्षा सुधारको माग राख्दै पटक-पटक अनशन बस्दै आएका डा. गोविन्द केसीले आजबाट सरकारी सेवाबाट अबकाश पाउने भएका छन् ।

उमेरहदका कारण उनले अनिवार्य अवकाश पाउने भएका हुन् । आजबाटै अबकाश पाउने भएपछि डा. केसीले पत्रकार सम्मेलनको आयोजना गर्ने जानकारी दिएका छन् । उनले सोमबार बिहान १० बजे महाराजगंजस्थित त्रिवि शिक्षण अवस्पतालको गणेशमान सिंह भवनमा पत्रकार सम्मेलन गर्ने जानकारी दिएका हुन् ।

पत्रकार सम्मेलनमा उनले आफ्नो एजेण्डालाई निरन्तरता दिने विषयमा जानकारी दिने बुझिएको छ । विगत सात वर्षदेखि चिकित्सा शिक्षामा सुधारको माग राखेर डा. केसीले आन्दोलन गर्दै आएका छन् ।

चारबुँदे माग राखेर ०६९ असार २१ मा उनी पहिलो पटक अनशन सुरु गरेका थिए। पछिल्लो पटक उनले १६ औं चरणको अनशन इलाममा बसेका थिए। उनी वरिष्ठ हाडजोर्नी तथा नशा रोग विशेषज्ञ हुन् ।