काठमाडौं – राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले अहिलेको राजनीतिक अवस्थाप्रति गम्भीर असन्तुष्टि प्रकट गरेका छन्।

फेसबुकमार्फत अभिव्यक्ति दिँदै लिङ्देनले देश भूराजनीतिको गम्भीर चक्रव्यूहमा फस्दै गएको र संकट दिनप्रतिदिन गहिरिँदै गएको बेला पनि नेताहरू आफ्ना साना स्वार्थ र व्यक्तिगत हितमा रमाइरहेको टिप्पणी गरेका छन्।

उनले लेखेका छन्, “काम कुरो एकातिर, कुम्लो बोकी ठिमीतिर। देश भूराजनीतिको गम्भीर चक्रव्यूहमा फस्दै गरेको, संकट गहिरिँदै गएको बेला पार्टी चलाउँछु, परिआए देश चलाउँछु भनेर धक्कु लाएर उमेर बिताएका मानिसहरू ‘पेटी इन्ट्रेस्ट’ मा दौडेको देख्दा दया लागेर आउँछ।”

लिङ्देनको यो टिप्पणी हालको सत्तारूढ गठबन्धन र प्रमुख विपक्षी दलका नेताहरूको राजनीतिक गतिविधितर्फ लक्षित भएको अनुमान गरिएको छ। उनले नेताहरूले राष्ट्रिय हितभन्दा व्यक्तिगत स्वार्थलाई प्राथमिकता दिएको आरोप पनि परोक्ष रूपमा लगाएका छन्।