काठमाडौं– सरकारले प्रहरी फिर्ता लगेसँगै नेकपा (एमाले)का अध्यक्ष केपी शर्मा ओलीको सुरक्षाको जिम्मा अब राष्ट्रिय युवा संघ नेपाल, भूपू सैनिक र प्रहरी संगठनले लिने भएका छन्।

एमाले नेता राजीव पहारीका अनुसार सरकारले सुरक्षाकर्मी फिर्ता बोलाएपछि ओलीको सुरक्षा जनस्तरबाट सुनिश्चित गर्ने निर्णय गरिएको हो। उनले भने, ‘अब जनताको नेताको सुरक्षा जनताले नै लिने छन्।’

सरकारले मापदण्ड विपरीत भन्दै ओली र माओवादी केन्द्रका अध्यक्ष पुष्पकमल दाहाल ‘प्रचण्ड’को सुरक्षामा खटिएका ६१ सुरक्षाकर्मी फिर्ता बोलाएको थियो। 

त्यसपछि एमालेका भातृ संगठन र शुभेच्छुक संस्थाहरूले ओलीको सुरक्षा आफ्नै व्यवस्थापनमा गर्ने तयारी थालेका हुन्।

‘पूर्व प्रधानमन्त्री मुलुकका महत्त्वपूर्ण व्यक्तित्व हुन्। यस्तो व्यक्तित्वको सुरक्षा गर्नु राज्यको जिम्मेवारी हो, तर सरकारले त्यसबाट विमुख भएको छ’, राष्ट्रिय युवा संघ नेपालको कार्यक्रममा बोल्दै पहारीले भने, ‘तर हामीलाई त्यसमा कुनै आपत्ति छैन, किनभने केपी ओली जनताका नेता हुन्, उहाँको सुरक्षा जनताले  गर्छन्।’