जुम्ला– यहाँका किसानलाई बर्खेबाली घरमा भित्र्याउन भ्याइनभ्याई छ । दसैँ सकिएसँगै यहाँका किसान खेतबारीमा पाकेको सिमी, कोदो, फापर मकैलगायत रैथाने खाद्य बाली भित्र्याउन व्यस्त छन् ।  रैथाने बालीमध्ये मार्सीधान यहाँको लोकप्रिय खाद्य बाली हो । 

हिमा गाउँपालिकाका किसान माया रोकायाले भनिन्, ‘खेतबारीमा पाकेको बाली भित्र्याउन रातिसम्म काम गर्दै आएका छौँ । मौसम पनि सफा छ । किसानले काटेको घाँस घामले राम्रोसँग सुकेको छ । खेतबारीको सबै काम गरिसकेपछि पशुचौपायालाई चर्नका लागि छोड्छौँ ।’

जिल्लाका आठवटै स्थानीय तहमा मार्सीधानको खेती हुने गरेको छ । हाल जिल्लामा दुई हजार ८०० हेक्टरमा धानखेती हुने गरेको कृषि विकास कार्यालयका प्रमुख रामभक्त अधिकारीले जानकारी दिए । 

यहाँका किसानले हाल चन्दननाथ–१, ३, लेकाली–१ र ३ मा उन्नत जातका मार्सीधानको खेती गर्दै आएका छन् । पछिल्लो समय मार्सीधानमा मरुवा रोगको जोखिम बढेसँगै किसान उन्नत जाततर्फ आकर्षित हुन थालेका हुन् ।

 मार्सीधानको क्षेत्रफल भने बर्सेनि घट्दै गएको छ । गत वर्ष एक हजार ५०० हेक्टरमा रोपिएको मार्सीधान यस वर्ष एक हजार दुई सय हेक्टरमा मात्रै खेती गरिएको कार्यालय प्रमुख अधिकारीको भनाइ छ ।