काठमाडौं– नेकपा (एमाले) का नेता महेश बर्तौलाले जेन-जी आन्दोलनको सन्दर्भमा गृहमन्त्री ओमप्रकाश अर्यालविरुद्ध गम्भीर आरोप लगाएका छन् । 

बर्तौलाले गृहमन्त्री अर्याललाई तत्काल गिरफ्तार गर्न सरकारसमक्ष माग गरेका छन् । बर्तौलाले आफ्नो वक्तव्यमा आन्दोलनभित्र सुनियोजित घुसपैठ र हिंसा भड्काउने काममा चालिएका ‘प्रायोजक’हरुका योजना र निर्देशनका प्रमुख पक्षपत्रका रूपमा गृहमन्त्रीलाई जिम्मेवार बनाउनुपर्ने उल्लेख गरेका छन् ।

बर्तौलाले के भने ? 

जेन-जी आन्दोलनको नाममा पुलिसबाट लुटिएका हतियार (बन्दुक र गोली) को अवस्था र ती उपकरणहरू अहिले कहाँ र कससँग छन् भन्ने सम्बन्धी जानकारी गृहमन्त्रीसँग पूर्णरूपमा हुनैपर्छ ।

जेन-जीले उठाएका भ्रष्टाचार अन्त्य र सुशासनसम्बन्धी शान्तिपूर्ण मागहरूभित्रै घुसपैठ गरी हिंसा र विध्वंस गराउने कामको सञ्जालमा वर्तमान गृहमन्त्रीको सम्बन्ध छ ।  

इतिहास र दस्ताबेज छानीछानी नष्ट गर्ने, घर तथा व्यावसायिक भवनमा तोडफोड, आगजनी र लुटपाटजस्ता गतिविधिमा गृहमन्त्रीका सम्बन्धित ‘प्रेरक’ र योजनाकारहरूको संलग्नता रहेको छ ।

सिंहदरबार, संसद् भवन, सर्वोच्च अदालत, अख्तियार र प्रहरी चौकीहरूमा आगो हाल्ने र ध्वस्त पार्ने कार्यमा पनि उनीहरू भूमिका खेल्ने गरेका थिए ।

यी गम्भीर तथ्यहरूका आधारमा देशलाई क्षति पुर्‍याउने योजनाकार मानिएकाले गृहमन्त्री अर्याललाई पदबाट मुक्त गरी राज्यविरुद्धको फौजदारी मामलामा तत्काल अनुसन्धान र पक्राउ गरिनुपर्नेतर्फ बर्तौलाले जोड दिएका छन् ।

बर्तौलाले समग्र रूपमा शान्तिपूर्ण आन्दोलनभित्र हुने हिंसा र आपराधिक गतिविधिका लागि सम्बन्धित अभियुक्तहरूमाथि पर्याप्त प्रमाण हुँदाहुँदै पनि कानुनी कारबाही नहुनुमा गम्भीर प्रश्न उठाएका छन् ।  

यसले देशभर अराजकता र दण्डहीनता बढाएको उनेले बताए । हालको घटनाक्रमले तत्काल शैक्षिक, प्रशासकीय र कानुनी कदम चाल्नुपर्ने माग पनि उनेले गरेका छन् ।

यो मुद्दाबारे गृह मन्त्रालय वा गृहमन्त्रीको कार्यालयतर्फबाट आधिकारिक प्रतिक्रिया अहिलेसम्म आएको छैन। यद्यपि लुटिएका हतियार र गोलीको खोजीमा सरकारको भूमिका निष्प्रभावी हुँदा प्रश्न उठिरहेको छ ।