काठमाडौं– एमाले अध्यक्ष केपी शर्मा ओलीले मंगलबार र बुधबार पार्टीको प्रदेश इन्चार्ज, अध्यक्ष र जिल्ला अध्यक्षहरूसँग भर्चुअल संवाद गरेका छन् । संवाद गरेपछि ओलीले आफूले भने सहज हिसाबले अध्यक्ष नछाड्ने संकेत गरेका छन् ।

ओलीले आफू एउटा विधिबाट अध्यक्ष भएको भन्दै भर्खरै सम्पन्न पार्टीको विधान महाधिवेशन पनि सर्वसम्मत रूपमा भएको भन्दै अध्यक्षबाट सहजै बहिर्गमन नहुने संकेत गरेको संवादमा सहभागी एक जिल्ला अध्यक्षले खबरहबलाई बताए ।

जेन-जी आन्दोलनको कारण सरकारबाट बाहिरिने अवस्थामा पुगेका ओलीले अहिलेको अवस्था उत्पन्न हुनुलाई घुमाउरो पाराले आफ्नो भूमिका र भूराजनीतिक असरको रूपमा व्याख्या समेत गरेको उनले बताए । ओलीले कुनै देशको नाम भने नलिएको उनको भनाइ छ ।

अहिले एमालेमा केही पदाधिकारीसहित ठूलो संख्याका नेता तथा कार्यकर्ताले ओलीले अध्यक्ष छाड्नुपर्ने भन्दै सार्वजनिक रूपमा नै अभिव्यक्ति दिएका छन् । सोही विषयलाई मध्यनजर गर्दै ओलीले भर्चुअल संवादमा फरक–फरक प्रदेशको सहभागिता गराउने प्रयास गरेको सहभागी अध्यक्षले बताए ।

भर्चुअल संवादमा सहभागी अधिकांश जिल्ला अध्यक्षहरूले अहिलेको अवस्थामा स्थानीय तहसम्म गएर पार्टीको काम कारबाही गर्न अप्ठ्यारो स्थिति पैदा भएको सुनाएका थिए । साथै, स्थानीय कार्यकर्ता र जनताको स्तरबाट आएका प्रतिक्रियाको विषयलाई पनि राखेका थिए ।

तर, ओलीले भने सामाजिक सञ्जालमा लेखेर समस्याको समाधान नहुने भन्दै जिम्मेवारी लिनुपर्ने र मार्गपशस्त गर्नुपर्ने आवाज उठाएकाहरूलाई जवाफ दिने कोसिस गरेको सहभागी अध्यक्षले बताए ।

भर्चुअल संवादमा ओलीले एमाले–कांग्रेशको मात्रै ६० प्रतिशत जनमत रहेको भन्दै आगामी निर्वाचनमा समेत मिलेर जान सक्ने संकेत गरेका थिए ।

उनले आगामी दिनमा आन्दोलनको आवश्यकता समेत हुनसक्ने भन्दै तयार रहन समेत भनेको सहभागी अध्यक्षले खबरहबलाई बताए ।

साथै, ओलीले भदौ २३ गतेको आन्दोलनको क्रममा सुरक्षाकर्मीले आवश्यक ब्यारिकेट राख्ने काम नगरेको र २४ गते हात नै उठाएको बताएका थिए ।

त्यस्तै, भर्चुअल संवादमा ओलीले माओवादीका नेता तथा कार्यकर्ताको घरमा क्षति भएको भए पनि माओवादी केन्द्रका अध्यक्ष पुष्पकमल दाहाल ‘प्रचण्ड’ जेन-जी आन्दोलनको षडयन्त्रमा नै रहेको बताएका थिए ।