काठमाडौं– हालैको वर्षाका कारण रोशी खोलाको बाढीले क्षतिग्रस्त बनाएपछि बिपी राजमार्गका केही ठाउँमा पैदल यात्रा गर्न समेत कठिन भएको छ ।  

बाढीपहिरोले सडक बगाउँदा यातायात सञ्चालन अवरुद्ध भएपछि पैदल यात्रा गरी गन्तव्यतर्फ प्रस्थान गर्ने यात्रुहरूलाई कठिनाइ भएको हो ।

बिपी राजमार्ग अन्तर्गत चौकीडाँडा हुँदै काभ्रेपलाञ्चोकका विभिन्न स्थानमा आवतजावत गर्न कठिनाइ भएपछि सशस्त्र प्रहरी बलले पैदल यात्राका लागि अस्थायी पैदल ट्रयाक बनाएको छ । 

चाडपर्व मनाएर चौकीडाँडा हुँदै काठमाडौं फर्किने यात्रुहरूलाई सशस्त्र प्रहरी बल, १५ नंवर गणको मनसुनजन्य विपद् उद्धारका लागि अस्थायी बेशमा खटिएका सशस्त्र प्रहरीले सहजीकरण समेत गरिरहेका छन् ।

बिपी राजमार्ग धुलिखेलदेखि चौकीडाँडासम्म यातायातका साधन सञ्चालन भए पनि त्यसयता सडक पूर्ण रूपमा अवरुद्ध छ । बढीपहिरोले बिपी राजमार्गको १७ स्थानमा क्षति पुर्‍याएको थियो । केही स्थानमा भए सडक निर्माणको कार्य सुरु गरिएको छ ।