काठमाडौं- नेपाल कम्युनिस्ट पार्टीका महासचिव नेत्रविक्रम चन्द ‘विप्लव’ ले माओवादी घटक र विचार मिल्नेसँग एकताका लागि वार्ता टोली गठन गरेका छन् ।

नेकपाको काठमाडौंमा बसेको केन्द्रीय कमिटीको बैठकमा माओवादी घटक र विचार मिल्ने समूहसँग वार्ता गर्ने निर्णयसहित टोली गठन गरिएको हो ।

वार्ता टोली संयोजकमा प्रवक्ता खड्गबहादुर विश्वकर्मा छन् । सदस्यहरूमा अनिल सी, शिलु सी, सुशील सी, चिरण र जितेन्द्र सी छन्।

नेकपा (माओवादी केन्द्र) ले पनि नेकपासँग एकताको लागि छलफल गरिरहेको छ । माओवादीको गत भदौमा बसेको स्थायी समिति बैठकले नेकपासँग एकता गर्ने निर्णय गरिसकेको छ ।

जेन–जी आन्दोलनपछि विकसित राजनीतिक घटनाक्रम अनुसार विप्लवले माओवादीसँग तत्काल एकता गर्नेगरी आफूलाई अघि बढाएका छन् ।

माओवादी केन्द्रका अध्यक्ष पुष्पकमल दाहाल प्रचण्डले पनि पहिलो प्राथमिकतामा राखेर विप्लव र माधव नेपाल नेतृत्वको नेकपा (एकीकृत समाजवादी) सँग एकताको तयारी गरेका छन् ।