काठमाडौँ- राष्ट्रिय स्वतन्त्र पार्टी(रास्वपा)ले जेन-जी आन्दोलनका क्रममा भएका घटनाको छानबिनका लागि पार्टीले सरकारलाई सहयोग गर्ने जनाएको छ ।

मंगलबार पार्टी कार्यालय बनस्थलीमा सञ्चारकर्मीसँगको छलफलमा रास्वपा प्रवक्ता मनिष झाले जेन-जी आन्दोलनका क्रममा तोडफोड तथा आगजनीका घटनामा रास्वपाका नेताहरूलाई मुछिएको भन्दै छानबिनका लागि सरकारलाई सहयोग गर्ने बताए ।

प्रवक्ता झाले भाद्र २३ गते भएको जेनजी आन्दोलनमा रास्वपा नेता कार्यकर्ताहरूको सहभागिता तुलनात्मक रुपमा सबैभन्दा बढी रहेको स्वीकारे ।

भदौ २४ गते भएको तोडफोड तथा आगजनीका घटनामा रास्वपा नेता कार्यकर्ताहरूको कुनै सहभागिता नरहेको उनले बताए ।

उनले आन्दोलनका क्रममा नख्खु कारागारमा समेत आगजनी हुने सम्भावना देखेपछि आफू त्यहाँ पुगेको बताए ।

तर आन्दोलनकारीको अगुवाका रुपमा सहभागी भएको भन्ने कुरामा सत्यता नरहेको उनले बताएका छन् ।

उनले लामिछानको सुरक्षाको जिम्मा लिन कारागारले भनेपछि आफूहरूले जिम्मा लिएको जिकिर गरे ।

प्रवक्ता झाले सुमना श्रेष्ठ लगायतका नेताले पार्टी छाडेकोप्रति समीक्षा गर्दै अहिलेसम्मको योगदानको सम्मान गर्ने निर्णय भएको बताए ।