काठमाडौँ- अमेरिकी राजदूत डीन.आर. थम्पसनले सोमबार अर्थमन्त्री रामेश्वरप्रसाद खनालसँग भेटवार्ता गरेका छन् ।

सिंहदरबारस्थित अर्थ मन्त्रालय पुगेर थम्पसनले खनालसँगको छलफलमा मिलेनियम च्यालेन्ज कोअर्पोरेशन (एमसीसी) कार्यान्वयनमा थप प्रतिबद्धता खोजेका छन् ।

भेटमा अर्थमन्त्री खनाल र अमेरिकी राजदूत थम्पसनबीच भदौ २३ र २४ गते भएको जेन-जी आन्दोलनपछि परिवर्तित अवस्था र अमेरिकाले गर्न सक्ने सहयोगबारे छलफल भएको थियो ।

उक्त भेटमा राजदूत थम्पसनले एमसीसीको सहयोगमा सञ्चालित परियोजनाहरू समयमै सम्पन्न गर्ने कार्ययोजनामा नेपाल सरकारको थप प्रतिबद्धता जरूरी रहेको पनि बताएका छन् ।

उक्त भेटमा अर्थमन्त्री खनालले एमसीसी परियोजनाको सफल कार्यान्वयनका लागि सरकारको तर्फबाट गर्नुपर्ने काममा ढिलाइ नहुने विश्वास दिलाएका उनको सचिवालयले जनाएको छ ।