काठमाडौं– भारतीय सिनेमा क्षेत्रका चर्चित अभिनेता मोहनलाललाई भारतको सर्वोच्च फिल्म सम्मान दादासाहेब फाल्के पुरस्कार २०२३ प्रदान गरिने भएको छ । 

सूचना तथा प्रसारण मन्त्रालयले शनिबार यस सम्मानको घोषणा गरेको हो । यसका अनुसार, मोहनलाललाई सेप्टेम्बर २३, २०२५ मा ७१ औं राष्ट्रिय चलचित्र पुरस्कार समारोहमा यो पुरस्कार प्रदान गरिनेछ ।

शनिबार गरिएको घोषणाअनुसार, मलयालमका सुपरस्टार मोहनलाल भारतीय सिनेमामा वर्षौंदेखिको योगदानको सम्मानस्वरूप यस प्रतिष्ठित अवार्ड प्राप्त गर्ने केही सर्वोत्तम कलाकारहरूमध्ये एक बनेका छन् । 

मोहनलालको करियर ४५ वर्षभन्दा बढीको छ, र उनले ४०० भन्दा बढी फिल्महरूमा अभिनय गरेका छन्। उनको योगदानलाई सम्मान गर्दै यस पुरस्कारको घोषणा गरिएको हो । 

यस सम्मानको घोषणा पछि, मोहनलालले आफ्नो आभार व्यक्त गर्दै यो पुरस्कार आफ्नो मात्र नभइ, सम्पूर्ण मलयालम सिनेमा र दर्शकहरूको भएको बताएका छन् ।

सिनेमाजगतका कलाकार, निर्देशक र फिल्मकर्मीहरूले पनि मोहनलाललाई यस सम्मानको अवसरमा बधाई र शुभकामना दिएका छन्। यस पुरस्कारले मोहनलालको भारतीय सिनेमा क्षेत्रमा लामो समयदेखिको योगदान र कलाकारिताको उत्कृष्टतालाई औपचारिक मान्यता दिएको छ ।