काठमाडौं – नेपाली कांग्रेसका प्रवक्ता डा. प्रकाशशरण महतले पार्टी महामन्त्री गगन थापाको टिप्पणीप्रति आक्रोश व्यक्त गरेका छन् । आइतबार बिहान आफ्नो जलेको घर महाराजगञ्जमा पत्रकार सम्मेलन गर्दै उनले यस्तो बताएका हुन् । जेनजी आन्दोलनपछि पार्टी नेतृत्व परिवर्तन हुनुपर्ने आवाज सामाजिक सञ्जाल र पार्टी बैठकमा महामन्त्री थापाले उठाएकोप्रति आपत्ति जनाउँदै महतले यस्तो बताएका हुन् ।

महतले थापाको नाम नलिइ आक्रोश व्यक्त गर्दै भने, ‘अहिले नयाँ परिस्थिति बन्ने बित्तिकै अब त एक छिन पनि हुँदैन भनेको के हो ? अभिभावकमाथि सांघातिक प्रहार हुँदा हामी उपचार पनि पर्खन सक्दैनौँ ?’ उनले अघिल्लो दिनसम्म ठिक हुने तर भोलिपल्ट हुँदैन भन्नु गलत भएको बताए । उनले देउवाको स्वास्थ्य अवस्था बुझ्न आफू आज अस्पताल जाने जानकारीसमेत गराए ।

त्यसैगरी पत्रकार सम्मेलनमा नेता महतले अन्तरिम सरकार संविधानसम्म्त बन्न नसकेको टिप्पणी गरेका छन् । उनले संसदबाट सरकार बनाउने बाटो हुँदाहुँदै त्यो हुन नसक्नु दुभाग्र्य भएको बताए ।

महतले भनेका छन्, ‘अन्तरिम सरकार बनेको छ । त्यसलाई संविधानसम्मत बनाउन सकिन्थ्यो । तर दुर्भाग्यवश त्यो हुन सकेन । त्यसलाई संसदमार्फत् नै अनुमोदन गराउन सकिन्थ्यो, त्यो भएन ।’ पछिल्लो समयको आन्दोलन र राजनीतिक घटनाक्रमलाई नेता महतले लोकतान्त्रिक व्यवस्थामाथिको आक्रमणको संज्ञा दिएका छन् । भदौ २३ र २४ गतेको आन्दोलनका क्रममा गोली चलेकोप्रति उनले आपत्ति जनाएका छन् ।

उनले नयाँ परिस्थितिबारे पार्टीमा नयाँ मन्थन हुने बताएका छन् ।