काठमाडौं– जेन-जी आन्दोलनको क्रममा एमालेको विद्यार्थी सङ्गठन अनेरास्ववियुबाट राजीनामा दिएका डाक्टर सुजन कडरिया फेरि अखिल अध्यक्षको रूपमा फर्कन खोजेपछि अखिल बागमती प्रदेशका ६ जिल्ला अध्यक्ष र इन्चार्जले लिखित आपत्ति जनाएका छन् ।

काभ्रे, सिन्धुपाल्चोक, धादिङ, चितवन, मकवानपुर र दोलखाका अध्यक्ष तथा इन्चार्जहरूले आपत्ति जनाएका हुन्।

भदौ २४ गते राजीनामा दिएका कडरियाले पछि स्थिति शान्त भएपछि आफूलाई ज्यान मार्ने धम्की आएर राजीनामा दिएको बताएका थिए ।

भानुभक्त ढकाल र शङ्कर पोखरेलले जबर्जस्ती अध्यक्ष बनाएका कडरियालाई दुवै नेताले आग्रह गरेर राजीनामा फिर्ता गर्न लगाएको एक अखिल नेताले बताएका छन्।

तर, कडरियालाई फर्कन नदिन र पूर्व अध्यक्षको सूचीमा उनको नाम नराख्न माग बढ्दै गएको छ। अखिल मुख्यालयमा उनको तस्बिर केही समयअघि फुटाइएको थियो भने नेमप्लेट समेत जलाइएको थियो।