काठमाडौं– फिफा विश्वकप २०२२ तथा एसियन कप २०२३ अन्तर्गत दोस्रो चरणको छनोटमा नेपालले अस्ट्रेलियाविरुद्धको ‘अवे’ खेल क्यानबेरास्थित जिआओ रंगशालामा केही बेरमा खेल्दैछ ।

अहिले रंगशालामा दर्शक आउने क्रम जारी रहेको छ भने मैदानमा खेलाडीहरु ‘वार्मअप’ गरिरहेका छन् ।

अस्ट्रेलियासँग खेल्न त्यहाँ पुगेको नेपाली टोलीलाई साथ दिन अस्ट्रेलियामा रहेका नेपालीहरु खेल हेर्न नेपाली झण्डासहित र‌ंगशाला पुगेका छन् ।

नेपाली समयानुसार २ बजेर ४५ मिनेटमा शुरु हुने खेलमा नेपाली खेलाडीले उच्च मनोबलका साथ मैदान उत्रिने प्रशिक्षक योहान कालिनले यसअघि नै बताइसकेका छन् ।

अस्ट्रेलियाविरुद्धको खेलका लागि मुख्य प्रशिक्षक कालिनले कप्तान किरण चेमजोङको नेतृत्वमा शुरुवाती ११ घोषणा गरिसकेका छन् ।

जसमा टोलीका स्टार खेलाडी नवयुग श्रेष्ठ र बिमल घर्ती मगर पहिलो रोजाइमा परेका छैनन् । उनीहरुको स्थानमा कालिनले युवा स्टार अभिषेक रिजाललाई अग्रपङ्तीको जिम्मा दिएका छन् ।

मिडफिल्डको जिम्मेवारीमा सुजल श्रेष्ठ, अन्जन बिष्ट, रोहित चन्द, विशाल राई र रवि पासवाङ रहेका छन् भने डिफेन्डरका रुपमा रञ्जीत धिमाल, देवेन्द्र तामाङ, अनन्त तामाङ र दिनेश राजवंशी छन् ।

यस्तै, गोलकिपरमा कप्तान किरण चेमजोङ रहेका छन । नेपाल अस्ट्रेलियासँग पहिलो पटक खेल्न लागेको हो ।