काठमाडौं – अख्तियार दुरुपयोग अनुसन्धान आयोगले भदौ २४ गते भएको आन्दोलनको क्रममा आयोगको टङ्गाल कार्यालय तथा मातहतका कार्यालयहरु (इटहरी, हेटौडा, पोखरा, बुटवल लगायत) मा भएको तोडफोड, आगजनी र चोरीका घटनाबारे सार्वजनिक सूचना जारी गरेको छ।

आयोगका अनुसार आन्दोलनको क्रममा सवारी साधन (चार पाङ्ग्रे र दुई पाङ्ग्रे), टेलिभिजन, कम्प्युटर सेट, माइक्रो ओभन, विभिन्न साइजका हार्ड डिस्क, स्क्यानर, क्यामरा, आइप्याड, मोबाइल, ल्यापटप, हिटर, पडा लगायतका सामग्रीहरु लुटपाट र चोरी भएका छन्।

उक्त घटनामा संलग्न व्यक्तिहरूलाई सीसीटीभी फुटेजमार्फत पहिचान गर्ने प्रक्रिया अघि बढिरहेको आयोगले जनाएको छ। यदि कसैले आयोग वा मातहत कार्यालय परिसरबाट यस्ता सामान लिएको वा प्राप्त गरेको भए काठमाडौको हकमा प्रहरी वृत्त मालीगाउँ वा आयोगको टङ्गाल कार्यालयमा, र मातहत कार्यालयको हकमा सम्बन्धित कार्यालय वा नजिकको प्रहरी कार्यालयमा फिर्ता बुझाइ दिन आग्रह गरेको छ । फिर्ता नगरे कानुन बमोजिम कारबाही गर्ने आयोगले चेतावनी समेत दिएको छ ।