काठमाडौं – प्रधानमन्त्री सुशीला कार्कीले घाइते जेनजीलाई भेटेर बंगाला झार्नुपथ्र्यो भनेकी छन्। बिहीबार अन्तरिम सरकारको प्रधानमन्त्रीका रुपमा शपथ लिएपछि शुक्रबार कार्कीले जेनजी आन्दोलनका घाइतेलाई भेटेकी हुन्।

घाइते भेट्नेक्रममा सिभिल अस्पताल पुग्दा प्रधानमन्त्रीले एक घाइतेसँग गरेको कुराकानी सामाजिक सञ्जालमा भाइरल भएको छ। प्रधानमन्त्रीको जिम्मेवारीमा रहेको समयमा हिंसा भड्काउने अभिव्यक्ति दिएको भन्दै उनको आलोचनासमेत भएको छ।

सामाजिक सञ्जालमा सार्वजनिक छोटो क्लिपमा कार्कीलाई देख्ने बित्तिकै सिभिल अस्पतालमा उपचाररत घाइते युवाले नमस्कार गर्छन्। नमस्कार गरे लगत्तै प्रधानमन्त्री कार्कीले भनेकी छन्- मोटो रहेछ मान्छे त। बंगारा झार्नुपर्थ्यो नि !’ त्यसभन्दा अगाडि र पछाडि संवाद भने भिडियोमा छैन।