काठमाडौं– नेकपा (एमाले) ले पनि आन्तरिक सरकारकी प्रधानमन्त्री सुशीला कार्कीद्वारा गरिएको संसद् विघटनको घोषणाप्रति असहमति जनाएको छ। 

एमाले महासचिव शंकर पोखरेलले शनिबार विज्ञप्तिमार्फत पार्टीको धारणा सार्वजनिक गर्दै संसद् विघटनको घोषणाप्रति असहमति जनाएका हुन् । 

‘हाम्रो पार्टी प्रतिनिधिसभा विघटनको यस घोषणाप्रति असहमत छ । प्रतिनिधिसभा विघटनपछि हुने संवैधानिक रिक्तता र त्यसले सिर्जना गर्ने राजनीतिक जटिलताप्रति गम्भीर तथा चिन्तित छ,’ विज्ञप्तिमा भनिएको छ । 

यसअघि नेपाली कांग्रेसले शुक्रबार राती नै पार्टीको केन्द्रीय कार्यसम्पादन समितिको बैठकबाट संविधान विघटनको विपक्षमा उभिने निर्णय गरेको थियो । 

एमाले विगतमा प्रतिनिधि सभा विघटन गरी नयाँ जनादेशका लागि मार्ग प्रशस्त गर्ने मुद्दा असंवैधानिक हुने सर्वोच्च अदालतको फैसला स्मरण गराएको छ ।

 ‘हाम्रो पार्टी अदालतको सोही व्याख्याअनुसार सम्माननीय राष्ट्रपतिज्यूबाट गरिएको घोषणाको संवैधानिक वैधता नरहेकोमा स्पष्ट छ,’ एमालेले भनेको छ । 

एमालेले मुलुकमा उत्पन्न असामान्य परिस्थितिमाझ नेपालको संविधान, लोकतान्त्रिक गणतन्त्र र आन्दोलनका अन्य उपलब्धीहरूको रक्षाका लागि संविधान पक्षधर शक्तिहरूबीच निरन्तर संवाद, समझदारी निर्माण र सहकार्य आवश्यक भएकोमा पनि जोड दिएको छ ।