काठमाडौं– तिब्बतका धर्मगुरु दलाई लामाले नवनियुक्त प्रधानमन्त्री सुशीला कार्कीलाई बधाई दिएका छन् । दलाई लामाले कार्कीलाई पत्र लेख्दै बधाई दिएको उनको आधिकारिक वेबसाइटले उल्लेख गरेको छ ।

‘तपाईँलाई थाहै छ, नेपाली र तिब्बती जनताबीच इतिहासदेखि नै निकट सम्बन्ध छ ।’ उनले लेखेका छन्, ‘सन् १९५९ पछि जबरजस्ती निष्कासित गरिएपछि तिब्बती समुदायलाई शरण र पुनस्र्थापना गर्नका लागि नेपाल सरकार र जनताप्रति म कृतज्ञ छु ।’

‘पक्कै पनि तिब्बती समुदाय तुलनात्मक हिसाबमा सानो छ, मेरो विश्वासमा यसले नेपालको आर्थिक वृद्धिमा उल्लेख्य योगदान दिइरहेको छ ।’ दलाई लामाले लेखेका छन् ।

पछिल्ला वर्षहरुमा नेपालमा जीवनका धेरै आयाममा विकास र समृद्धि बढिरहेको भन्दै गरिब र विपन्न जनताको जीवन सुधार गर्न सके यी उपलब्धिहरु अझ धेरै अर्थपूर्ण हुने उल्लेख गरेका छन् ।

उनले यस चुनौतिपूर्ण समयमा नेपाली जनताको आशा र महत्वकाङ्क्षा पूरा गर्ने सफलता मिलोस् भन्ने कामना पनि गरेका छन् ।