काठमाडौँ- सोमबार र मंगलबार देशव्यापी आन्दोलन गरेका जेन-जीसँगको वार्ताबाट अन्तरिम सरकारको टुंगो लाग्न नसकेको अवस्थामा नेपाली सेनाले कडाइ गर्न थालेको छ ।

सेनाले बिहीबार साँझ ७ बज्नेबित्तिकै काठमाडौँका मुख्य बजार क्षेत्र बन्द गराएको छ । दिनभर सडक गस्तीमा रहेको सेनाले बिहीबार साँझ काठमाडौँका मुख्य बजार क्षेत्र कडा निर्देशनसहित बन्द गराएको हो ।

प्रधानसेनापति अशोक सिग्देल बुधबार र बिहीबार दुई दिन विवादित अभियन्ता दुर्गा प्रसाईंसँग लामो सम्वादमा थिए । प्रसाईंले आफूलाई अहिले पूर्वराजा ज्ञानेन्द्र शाहको असली प्रतिनिधिका रुपमा चिनाउँदै आएका छन् ।

कुनै हालतमा राजा फर्काउनुपर्ने पक्षमा उभिएका पूर्व एमाले नेता उनी चैत १५ को घटनामा करिब ३ महिना जेल परेका व्यक्ति हुन्। तर उनैसँग प्रधानसेनापति सिग्देल बाक्लो संवादमा छन् ।

सिग्देलले बुधबार मात्रै जेन-जीका नेताहरूसँगको भेटमा प्रसाईंलाई पनि यो आन्दोलनको हिस्सेदारका रुपमा प्रस्तुत गरेका थिए । उनले जेन-जीलाई प्रसाईंसँग पनि वार्ता गरेर कुरो मिलाउन भनेका थिए ।

बुधबार करिब ६ घण्टा जंगी अड्डामा बिताएका प्रसाईंलाई बिहीबार बिहान सेनाले आफ्नै सुरक्षासहित ल्याएको थियो । अन्तरिम सरकारकी प्रधानमन्त्रीका रुपमा हेरिएकी पूर्वप्रधानन्यायाधीश सुशीला कार्की र प्रसाईंलाई सेनाले विशेष सुरक्षासहित जंगी अड्डा लगेको थियो ।

यता दुई दिनमै दुईतिहाइको शक्तिशाली सरकार पल्टाएका जेन-जीहरू भने बुधबार राति र बिहीबार दिनभर भद्रकाली अगाडिको सडकमा एकआपसमा गलफत्ती गरेर बसे । उनीहरूबीच त्यहाँ कुटाकुटसमेत भएको छ।

नेताहरूमाथि कडाइ

यसैबीच प्रसाईंसहितका व्यक्तिहरूसँग संवाद गरिरहेको सेनाले मंगलबार सुरक्षाका लागि उठाइएका नेताहरूमाथि कडाइ गरेको छ । उनीहरूका मोबाइल फोन र सामाजिक सञ्जालमासमेत प्रतिबन्ध लगाएर सेनाले कडाइ गरेको हो ।

कामचलाउ प्रधानमन्त्री, नेपाली कांग्रेसका सभापति शेरबहादुर देउवा र नेकपा माओवादी केन्द्रका अध्यक्ष पुष्कपकमल लादहा प्रचण्डसमेत अहिले सेनाकव नियन्त्रणमा छन् । सेनाले आफ्नो नियन्त्रणमा रहेका नेताहरूलाई अघोषित नजरबन्दको शैलीमा राखेपछि अनेक शंका उपशंका उब्जिएका छन् ।

देश इतिहासकै सबैभन्दा तरल र अस्थिर अवस्थाबाट गुज्रिरहँदा सामाजिक सञ्जालमा सेनाको योजनामा राजसंस्था फर्काउन लागेको आशंका पनि गर्न थालेका छन् । उनीहरूले बिहीबार मध्यरातिसम्म सेनाले कुनै ठूलो निर्णय लिन सक्ने लख काट्न थालेका छन् ।

तर उनीहरूको अनुमानबीच सेनाले शुक्रबारका लागि कर्फ्यु केही खुकुलो बनाएको छ । गृहप्रशासन निष्प्रभावी भएको अवस्थामा जंगी अड्डा आफैंले कर्फ्यु जारी गरिरहेको छ । अब उसैले कर्फ्यु र निषेधाज्ञामा हेरफरेको क्रम अघि बढाएको छ।

जेन-जीसँगको संवादले दुई दिनमा पनि गाँठो फुक्न नसकेको अवस्थामा सेनाले चाल्न सक्ने सम्भावित कददमा धेरैको नजर टिकेको छ ।

बिहीबार साँझैदेखि बजार बन्द गराउन सेना उत्रिएपछि यस्तो शंकामा थप मलजल भएको छ। यसैबीच सेनाले संसद् भवन बानेश्वर क्षेत्रसहितका सडकबाट पत्रकारहरूलाई समेत हिँडडुलमा कडाइ गर्न थालेको । आवातजावतमा रोक लगाएपछि पत्रकारहरूलाई पनि रिपोर्टिङमा निस्किन कठिन हुन थालेको छ।