काठमाडाैं – प्रधानमन्त्री केपी शर्मा ओलीले सोमबार कम्तीमा १९ जनाको ज्यान जाने गरि भएको जेनजीको आन्दोलनमा सरकारी दमनबारे मुख खोलेका छन् ।

जेन–जी पुस्ताले आह्वान गरेको प्रदर्शनका क्रममा भएको घटनाले आफू मर्माहत भएको प्रधानमन्त्रीले बताएका छन्। उनले दुई पृष्ठ लामो वक्तव्य निकाल्दै आन्दोलनमा बाह्य घुसपैठ भई संवैधानिक निकायका कार्यालयमा तोडफोड र आगजनी भएपछि अप्रिय स्थिति आएको दाबी गरेका छन् ।

प्रधानमन्त्री ओलीले भनेका छन्, ‘जेन–जी पुस्ताले राखेका मागप्रति सरकार नकारात्मक थिएन। हामी उनीहररूको माग सुन्दै थियौं। तर घुसपैठियाले राज्यका सम्पत्तिमा तोडफोड र आगजनी गरेपछि त्यसलाई रोक्ने क्रममा ज्यान जाने दुःखद अवस्था आयो।’

सामाजिक सञ्जालबारे ओलीले सरकारले सामाजिक सञ्जाल बन्द गर्ने नीति नलिएको स्पष्ट पारेका छन्। सर्वोच्च अदालतको आदेशपछि सम्बन्धित कम्पनीलाई नेपालमा दर्ता र सूचीकरण गर्न आग्रह गरिएको पनि उनले बताएका छन्। केही कम्पनीले आदेश पालना नगरेकाले अस्थायी रुपमा सामाजिक सञ्जाल निस्क्रिय गरिएको उनको भनाइ छ।

प्रधानमन्त्रीले भनेका छन्, ;सरकार सामाजिक सञ्जाललाई रोक्ने पक्षमा छैन। दर्ता र सूचीकरणपछि प्रयोग गर्न सकिने वातावरण सुनिश्चित गरिनेछ।’

प्रधानमन्त्री ओलीले सोमबारको घटनामा ज्यान गुमाएका परिवारप्रति गहिरो समवेदना प्रकट गर्दै मृतकका परिवारलाई राहत र घाइतेहरूको निःशुल्क उपचार सुनिश्चित गर्ने प्रतिवद्धता व्यक्त गरे।

यस्तै, उनले १५ दिनभित्र प्रतिवेदन पेस गर्ने गरी छानबिन समिति गठन गरिने घोषणा गर्दै आगामी दिनमा यस्ता दुर्घटना रोक्न आवश्यक सिफारिस गरिने पनि बताएका छन् ।