काठमाडौं – नेपाली कांग्रेसका वरिष्ठ नेता डा. शेखर कोइरालाले सोमबार जेनजी आन्दोलनमा भएको घटनाप्रति कडा आपत्ति जनाउँदै सामाजिक सञ्जालमार्फत सरकारको आलोचना गरेका छन् ।

उनले शान्तिपूर्ण ढंगले पुस्तक र कापी बोकेर उज्ज्वल भविष्यको सपना देखिरहेका विद्यार्थीमाथि सरकारले गोली प्रहार गरेको भन्दै यसलाई निरंकुशता र क्रुरताको चरम रूप भनेका छन् ।

कोइरालाले आफ्ना प्रियजनहरूको हत्या गरिएको भन्दै आफू मर्माहत भएको उल्लेख गरेका छन् । उनले लेखेका छन्, ‘श्रद्धाञ्जलीका केही शब्दले राष्ट्रकै यो अपूरणीय क्षतिमा मल्हम लगाउन सक्दैन । यस पीडादायी क्षणमा म तपाईं र तपाईंका अभिभावकहरूसँगै छु र रहिरहनेछु ।’

उनले जेनजी युवाहरूका माग समयसापेक्ष र जायज रहेको भन्दै भ्रष्टाचार निर्मूल गर्ने आवाजलाई दबाउन खोज्नु लोकतन्त्रविरोधी प्रवृत्ति भएको टिप्पणी गरे । सामाजिक सञ्जाल बन्द गर्ने सरकारको निर्णयलाई उनले अधिनायकवादसँग तुलना गर्दै आजबाट सरकारको औचित्य समाप्त भएको समेत प्रस्ट पारे ।

कोइरालाले मुलुकमा देखिएका समस्याहरूको समाधान शान्तिपूर्ण र विधिसम्मत ढंगले खोज्नुपर्ने बताउँदै जनतासँगै उभिने अठोट दोहोर्‍याएका छन् ।