काठमाडौं– काठमाडौंसहित देशका विभिन्न स्थानमा जेन–जी पुस्ताको प्रदर्शनले अवस्था तनावग्रस्त भएपछि नेकपा माओवादी केन्द्रले मध्यपहाडी लोकमार्ग अभियान स्थगित गरेको हो ।

नेकपा (माओवादी केन्द्र) का उपलब्ध पदाधिकारीहरूको आकस्मिक बैठक गोरखाको भीमसेन थापा गाउँपालिका–३, टारिफाँटमा बसेर यस्तो निर्णय लिएको हो । 

बैठकले जारी ‘जनतासँग माओवादी मध्यपहाडी (पुष्पलाल लोकमार्ग) जनजागरण अभियान’ स्थगित गर्दै मंगलबार काठमाडौँमा पूर्ण पदाधिकारी बैठक बोलाउने निर्णय गरेको हो । 

बैठकले जेन–जी पुस्ताको प्रदर्शनका क्रममा भएको घटनाले स्तब्ध र गम्भीर बनाएको माओवादीले जनाएको छ । 

प्रहरीको गोली लागेर मृत्यु भएका युवाप्रति हार्दिक श्रद्धाञ्जली दिनुका साथै माओवादीले घाइतेहरूको शीघ्र स्वास्थ्यलाभको कामना गरेको छ ।

जेन–जीले उठाएका सामाजिक सञ्जालमाथिको प्रतिबन्ध हटाउने र भ्रष्टाचारविरुद्धका मागहरूलाई तत्काल सम्बोधन गर्न तथा स्थिति थप बिग्रिन नदिन जिम्मेवारीपूर्वक ठोस कदम चाल्न माओवादीले सरकारसमक्ष माग गरेको छ ।