काठमाडौं – राष्ट्रिय स्वतन्त्र पार्टी (रास्वपा)का सभापति रवि लामिछानेले नख्खु कारागारबाटै जेनजी आन्दोलनमा समर्थन जनाएका छन् । उनले आइतबार निजी सचिवालयमार्फत सार्वजनिक गरेको विज्ञप्तिमा भोलिदेखि सुरु हुन लागेको युवापुस्ताको आन्दोलनलाई ऐतिहासिक मोडको रूपमा व्याख्या गरेका छन्।

लामिछानेले भनेका छन्, “शासकहरूले तपाईंहरुलाई विधि र विवेकको शासन त दिएनन् नै, आफ्ना खुसी र दुःख, सफलता र असफलता बाँड्ने सामाजिक सञ्जालको सानो कुना पनि खोसे । तर तपाईँहरूको विवेक र आवेगसँग यो देशको इतिहास बदल्ने शक्ति छ।”

उनले भोलिको दिनलाई इतिहासको नयाँ सुरुवात भएको दिनका रूपमा वर्णन गर्दै युवाहरूलाई सचेत रहन र विवेकपूर्वक अघि बढ्न आग्रह गरेका छन्। लामिछानेले आन्दोलनमा घुसपैठ र उत्तेजना हुने सम्भावना औंल्याउँदै संयमता अपनाउन सुझाव दिएका छन्।

“तपाईंको आफ्नो इतिहास र यो देशको इतिहास पनि तपाईँकै हातबाट लेखिँदैछ,” भन्दै लामिछानेले नख्खु जेलको कालकोठरीबाटै शुभेक्षा, सद्भाव र ऐक्यबद्धता प्रकट गरेका छन्।