काठमाडौं– राष्ट्रिय स्वतन्त्र पार्टी (रास्वपा) का सांसद हरि ढकालले सदनमा सिर्जनात्मक बहस गर्न नसकेर सत्तापक्षले आफ्नो पार्टीका नेताहरूको ‘डिप फेक भ्वाइस रेकर्ड’हरू बाहिर छरपष्ट पार्न थालेको आरोप लगाएका छन् ।
 
प्रतिनिधिसभाको बुधबारको बैठकको सुरूवातमै सभामुख देवराज घिमिरेले उपलब्ध गराएको समयमा बोल्दै उनले सदनमा सिर्जनात्मक बहस गर्न नसकेर सत्तापक्षले रास्वपाका नेताहरूको ‘डिप फेक भ्वाइस रेकर्ड’हरू बाहिर छरपष्ट पार्न थालेको आरोप लगाएका हुन् । 

‘कर्कस, अराजक, असहिष्णु शैलीसँग मिथ्या आरोपहरू हामी माथि लगाइराख्नुभएको छ । यो सदनभित्र सिर्जनात्मक बहस गर्ने हामीहरू माथि नसकेर हाम्रा नेताहरूको डिप फेक भ्वाइस रेकर्डहरू बाहरि छरपष्ट पार्न थालिएको छ,’ सांसद ढकालले भने, ‘म यो शैलीको, यो चरित्रको निन्दा गर्न चाहन्छु ।’

उनले विगत ९५ दिनदेखि रास्वपाका सांसदहरूले दुई मिनेट सदनमा राखेका कुराहरूको प्रतिवादमा सत्तापक्षीय सांसदहरूले घण्टौँ खर्च गरिरहेका पनि टिप्पणी गरे ।   

‘भिजिट भिसाको नाउमा गरिएको मानव तस्करी र भ्रष्टाचाविरूद्ध हामी आन्दोलित हुँदै गर्दा सत्तापक्षले सुन्दैन,’ ढकालले भने, ‘सत्तापक्षका माननीयज्यूहरूले हामीले बोलेको दुई मिनेटका लागि यो ९५ दिन घण्टौं समय प्रतिवादमा खर्च गरिरहनुभएको छ ।’

उनले विरोधका आवाजहरूलाई दमन गरेर लोकतन्त्र बलियो नबन्ने पनि जिकिर गरे । सांसद ढकालले अन्तिममा रास्वपाको आन्दोलन जारी रहेको र सदन बहिष्कार यथावत रहेको पनि बताए ।