काठमाडौं– आन्तरिक किचलोमा फसेको नागरिक उन्मुक्ति पार्टी (नाउपा) ले संस्थापक केन्द्रीय सदस्यहरू र पार्टीका तर्फबाट निर्वाचित जनप्रतिनिधिहरूको संयुक्त बैठक बोलाएको छ । 

अध्यक्ष रञ्जिता श्रेष्ठले संस्थापक केन्द्रीय सदस्य, प्रतिनिधिसभा सदस्य, प्रदेशसभा सदस्य र पालिका प्रमुख, उपप्रमुखसहितको बैठक बोलाएकी हुन् । 

 उनले भदौ १५ र १६ गतेका लागि काठमाडौंको जमलस्थित होटल यलो प्यागोडामा बैठक आह्वान गरेकी छन् । अध्यक्ष श्रेष्ठका अनुसार भदौ १५ गते दिउँसो १ बजेबाट नाउपाको बैठक बस्ने छ । 

 बैठकका लागि ५ वटा एजेन्डाहरू तय गरिएको अध्यक्ष श्रेष्ठले जानकारी दिइन् । उनका अनुसार बैठकमा समसामयीक राजनीतिक विषयसँगै पार्टीको विधान संशोधन, केन्द्रीय सदस्य मनोनयन, निर्वाचन आयोगमा पार्टी अद्यावधिक र विविध विषयमा छलफल गर्ने एजेन्डाहरू छन् ।